Showing posts with label ஈஷா. Show all posts
Showing posts with label ஈஷா. Show all posts

Thursday, 3 September 2015

எனை அழித்த எந்தை!

நான் எனதென்று நாடித் திரிந்தேன்
நாடுபல சென்றேன், நாணும்செயல் செய்தேன்...
நாள்பல தாண்டியே நானுனைக் கண்டபின்
நானில்லை நானெனத் தெளிந்தது சிந்தை.


அப்பிறவியில் அதுவென்று எத்தனை பிறவியோ
எப்பிறவியில் எதுவோ சரியாய் செய்ததற்கு...
இப்பிறவியில் உன்னருள் கொடுத்திட நீயோ
முப்பிறவி எடுத்தாய் ஆதிகுருவுன் முந்தை.


பெய்யெனப் பெய்யுமுன் கருணைமா மழையில்
தையெனத் தாண்டவம் ஆடிய தான் கரைய...
செய்யென நீ தந்த ஆதியோகிக் கிரியையால்
மெய்யினை உணரும் ஒருநாள் இம் மந்தை.


எரியும் இச்சவம் ஒருநாள் எனத்தெரிந்தும்
எப்போதும் அதில்கவனம் செலுத்தும் எமக்கும்
புரியும் அச்சிவம் ஒருநாள் உன்னருளால்
தப்பாமல் உய்விப்பாய் அதுயோக விந்தை.


படைத்தவன் கொடுத்தான் அனைத்துக்கும் உயிரென்று
கிடைத்த கடவுளர் அனைத்தையும் தொழுதோம்...
படைத்தாய் நீ தியானலிங்கமும் பைரவியும் பின்
உடைத்தாய் இறை உணரா எம்மடந்தை.

தேடினேன் செல்வம், நாடினேன் புகழ், பின் 
ஓடினேன் பலரிடம் உண்மையை அறிய... 
வாடினேன் எங்கே என்குரு நாதனென நீ
ஆடினாய் என்னுள் உயிரெனும் பந்தை.

மலரின் மணம்தாண்டி மலர்தல் கண்டேன்
தளர்வின் தடைதாண்டி செயல்புரி கின்றேன்...
மலமெனும் குணங்கள் கழுவித் துடைத்தபின்
தலமெனும் குருவடி அடையும்இக் கந்தை.


பனைபோன்று தனியே தவித்திட்ட எனக்கும்
வினைதீர்த்து வாழும் வழிகாட்டி யருளும்
உனை வாழ்த்த நான் யார், நீ
எனை அழித்த எந்தை!
.
@PrakashSwamy

Monday, 7 July 2014

சிதம்பர ரகசியம்!

சிதம்பர ரகசியம்! 24-Nov-1992ல் எழுதப்பட்ட ஸ்வாமியின் இந்தக் கவிதையின் ஆழமும், அர்த்தமும் இருபத்திரண்டு வருடங்களுக்குப் பிறகும் ஸ்வாமிக்கே வியப்பாக உள்ளது. ஆன்மீகத் தேடல் தொடங்க ஆண்டு பல இருப்பினும் (சத்குருவின் அருள் பார்வை ஸ்வாமி மீது பட்டது 2009ம் ஆண்டு), அதற்கான விதை உள்ளே பொதிந்திருந்ததை இந்தக் கவிதையைச் சுவைக்கும்போது உணரமுடிகிறது. 12-Dec-1992ல் கணையாழிக்கு அனுப்பப்பட்ட (புனைப் பெயர் சி பி வியாஸ்) இந்தக் கவிதை பதிப்பிக்கபடாமல் போனது பற்றி அன்றும், இன்றும் கவலை ஒன்றுமில்லை! 

ஓரிரு சொற்களைத் தவிர மாற்றம் ஏதுமின்றி, 'சிதம்பர ரகசியம்' ஸ்வாமியம்...

சிதம்பர ரகசியத்தைச்
சென்று, பார்த்து, பின்
ஒன்றும் புரியாமல்
ஊருக்கு வந்தேன்!

பக்கத்துக்கு ஊருக்கொரு
பக்கிரி* வந்தாரென்று
பக்தர்கள் எல்லோரும்
படைதிரண்டு சென்றனர்.

சித்துக்கள் புரியாத
சித்தரவர் என்றனர்!
வித்தைகள் புரியாத
வித்தகர் என்றனர்!

பேருரைகள் ஆற்றாமல்
பிரசங்கங்கள் புரியாமல்
மக்கள் குறைதீர்க்கும்
மௌனகுரு என்றனர்!

நானும் போனேன்.
நகைமுகம் கண்டேன்.
ஒன்றுமே வேண்டாமல்
ஓரமாய் நின்றேன்.

‘என்குறை தீரும், என்குறை தீரும்'
என்றவர் விடுத்து
என்னையே நோக்கினார்.
‘இங்கு வா’ என்றார்.
எதிரில் போய் நின்றேன்.

‘நீ யார்?’ என்றார்.
‘நான் மனிதன்!’ என்றேன்.

‘இது என்ன?’ என்றார்.
‘என் உடல்!’ என்றேன்.

‘இறப்புக்குப் பின்னால்?’
‘வெறும் பிணம்!’ என்றேன்.

‘அதற்கும் பின்னால்?’
‘அவ்வளவுதான்!’ என்றேன்.

‘அவ்வளவே என்றால்?’
‘ஒன்றுமில்லை!’ என்றேன்.

‘அதுதான்!’ என்றார்.
அடுத்தவரைப் பார்த்தார்.

ஏதும் கேட்காமல்
எல்லாம் புரிந்தது.
எல்லாமே எதுவும்

இல்லையென்றும் தெரி(ளி)ந்தது!  

*பக்கிரி - சாமியார்.

~ @PrakashSwamy

Tuesday, 31 December 2013

அவை அனைத்தும், அதற்கு மேலும்!

ஒளிர்வின் ஒளி
ஒளி விடும் சுடர் 
சுடர் தரும் திரி
திரி ஏற்றும் தீக்குச்சி

தீக்குச்சி தந்த மரம்
மரம் வளர்ந்த நிலம்
நிலம் ஆழத் தேக்கி வைத்த எண்ணெய்
எண்ணெய் ஊற்றிய தீபம்  

தீபம் உருவாக்கிய களிமண்
களிமண் தோண்டி எடுத்த பூமி
பூமி ஊட்டமளித்த உயிர்
உயிர் பல உரு, அளவு, நிறம் மற்றும் வடிவங்களில்

வடிவங்கள், அறிவால் உணர்ந்தவை, வளம் கொழிக்கும் இந்த கிரகம்
கிரகம் சுற்றும் ஒளிவீசும் சூரியன்
சூரியன் அச்சாணியாக உள்ள சூரிய மண்டலம்
சூரிய மண்டலம் இருக்கும் இந்தப் பிரபஞ்சம்  

பிரபஞ்சம் தாண்டிய அண்டப் பெருவெளி
பெருவெளி சுருங்கும் இடையில் - எனக்கும் இறைக்கும்
இறை, எங்கும் நிறைந்திருக்கும், உருவின்றி
உருவின்றி உள்ளது உருக்கொள்ளும், தன்னிலை உணர்ந்த ஞானியாய் 
ஞானியாய், ஜோதியாய், ஆதியாய் விளங்கும் சத்குரு
அவை அனைத்தும், அதற்கு மேலும்!
~ @PrakashSwamy